काठमाडौँ । पूर्वको कर्णाली भनेर चिनिने चीनको सीमावर्ती क्षेत्रमा पर्ने भोटखोला गाउँपालिकाले काठमाडौँमा शिविर सञ्चालन गरी गाउँपलिकाबासीलाई सेवा प्रदान गर्ने भएको छ । दुर्गम र विकट क्षेत्रमा रहेको सङ्खुवासभाको यस गाउँपालिकाले गाउँ पुग्न नसक्ने र आर्थिक रूपमा ठुलो भार बेहोर्नु पर्ने भन्दै काठमाडौँमा पाँच दिने दर्ता शिविर सञ्चालन गर्ने भएको छ ।

दुर्गम क्षेत्र पुग्न समस्या हुने भएपछि काठमाडौँमै शिविर सञ्चालन गरी सेवा प्रदान गरिएको गाउँपालिका अध्यक्ष वाङ छेदर लामाले जानकारी दिनुभयो ।  व्यक्तिगत घटना दर्ता (जन्म, मृत्यु, विवाह, बसाई सराई र सम्बन्ध विच्छेद तथा सामाजिक सुरक्षा भत्ता सम्बन्धीका कार्यहरू लगायतका सामान्य प्रकृतिका सेवा लिन गाउँपालिका पुग्नु पर्ने र हिजोआज हिमपात र अन्य समस्याले गाउँपालिकामा पुग्न समस्या हुने भएकाले सेवा दिन  यो शिविर आयोजना गरिएको अध्यक्ष लामाले बताउनुभयो । शिविरले भोटखोलाबासीलाई राहत मिल्ने विश्वास गाउँपालिकाले लिएको छ ।

नेपाल सरकार गृह मन्त्रालय, राष्ट्रिय परिचय पत्र तथा  पञ्जिकरण विभाग, व्यक्तिगत घटना दर्ता तथा सामाजिक सुरक्षा व्यवस्थापन सुचना प्रणाली अन्तर्गत व्यक्तिगत घटना दर्ता गर्नु पर्ने अनिवार्य रहेको छ । भोट खोलाका करिब पाँच हजार बढी जनसङ्ख्या रोजगार र अन्य सिलसिलामा काठमाडौँमा आइ अस्थायी रूपमा बसोबास गर्ने गरेको गाउँपालिकाको तथ्याङ्क छ ।
गाउँपालिकाले २०७९ साल माघ २२ गते देखी २६ गते सम्म कपन स्थित ११ डाईमण्ड रेष्टुरण्ट एन्ड क्याफे परिसरमा बिहान १० बजे देखि साँझ ४ बजे सम्म शिविर सञ्चालन गर्ने जनाएको छ । बुढानीलकण्ठ १० कपन स्थित आकाशे धारा गैरी गाउँमा शिविर हुने र आवश्यकता अनुसार ९८५२०९९७५३ नम्बरमा समेत सम्पर्क गर्न सकिने जनाएको छ ।